Kryetari i bashkisë së Tiranës i shkarkuar nga qeveria, Erion Veliaj kërkoi sot përpara Gjykatës Kushtetuese që të rrëzojë vendimin e Këshillit të Ministrave të firmosur nga Edi Rama për ta larguar nga posti. Në fjalën e tij, Veliaj tha se po tentohet që të largohet nga bashkia përmes makinacioneve.
“Kur pushteti që buron nga vota devijohet, kjo kthehet në tradhti morale. Dhe atëherë, sipas meje, Republika nuk rrezikohet nga asnjë armik i jashtëm, por nga brenda. Jam këtu për të mbrojtur betimin tim si kryetar i Bashkisë së Tiranës. Këtë betim do ta mbroj edhe sot, para jush.
Nuk ka asgjë më fisnike sot sesa të mbroj besimin. Më thanë se s’kam qenë në detyrë. Edhe kjo ishte fyerja më e rëndë në jetën time. Është fyerja më e rëndë që më ka ardhur nga bashkëpunëtorët e mi. Lutem çdo ditë për ta dhe them: “Fali, sepse nuk e dinë ç’kanë bërë” tha Veliaj.
