Tedi Blushi, nga radhët e opozitës, ka kërkuar sot në Kuvend ngritjen e një Komisioni Hetimor për të hetuar shpërdorimin e fondeve IPARD, që synojnë mbështetjen e bujqësisë shqiptare.
Ai paralajmëroi se fermerët po humbasin miliona euro për shkak të keqmenaxhimit dhe përfitimeve të dyshimta nga individë të lidhur me qeverinë.
“Ju nuk mund t’i lësh fermerët pa mbështetje, ndërkohë që paratë përfundojnë te inceneratorët dhe familjarët e pushtetit,” tha Blushi, duke e cilësuar situatën si emergjente.
Ai akuzoi SPAK-un për mungesë veprimi dhe kreun e grupit parlamentar të PS-së, Taulant Balla, për përpjekje për të penguar ngritjen e komisionit, duke paralajmëruar se çdo bllokim do të jetë shkelje e së drejtës së opozitës për të kërkuar llogari.
