Dhomat e Specializuara në Hagë kanë njoftuar pezullimin e seancave gjyqësore të planifikuara për rastin e ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi.
Vendimi u mor pas përfundimit të Konferencës së Statusit, ku u njoftua se të gjitha seancat dëgjimore për nëntor dhe dhjetor janë anuluar dhe hequr nga kalendari i gjykatës.
Trupi gjykues ka bërë të ditur se pritet të nxjerrë një vendim mbi hapat e mëtejshëm në procedurën gjyqësore gjatë kësaj jave.
Në seancat e mëparshme të gjykatës, janë dëgjuar dëshmitë e disa diplomatëve dhe zyrtarëve të lartë, përfshirë James Rubin, Cristopher Hill dhe Wesley Clark, të cilët kanë dhënë dëshmi lidhur me periudhën e luftës dhe arritjen e armëpushimit ndërmjet Kosovës dhe Serbisë.
Ish-krerët e UÇK-së janë mbajtur të izoluar në Hagë për pesë vjet dhe akuzohen për krime lufte dhe krime kundër njerëzimit.
Seancat e reja të planifikuara për të dëgjuar më shumë dëshmitarë dhe për të diskutuar akuzat ndaj tyre janë pezulluar, duke shtuar pasiguri për ecurinë e procesit gjyqësor.
