Presidenti amerikan Donald Trump dha një përditësim të shkurtër mbi bisedimet e paqes për Ukrainën nëpërmjet një postimi në rrjetet sociale. Në një mesazh të shkurtër në Truth Social, presidenti amerikan shkroi: “A është vërtet e mundur që të ketë shumë përparim në bisedimet e paqes midis Rusisë dhe Ukrainës??? Mos e besoni derisa ta shihni, por ndoshta diçka e mirë po ndodh”.
Dje filluan në Gjenevë bisedimet midis SHBA-së dhe Ukrainës në lidhje me planin e paqes të propozuar nga SHBA-të për t’i dhënë fund luftës midis Rusisë dhe Ukrainës. Në fakt, siç u tha gazetarëve shefi i Departamentit të Shtetit, Marco Rubio, “Ishte ndoshta dita më produktive që kemi pasur për këtë çështje, ndoshta në të gjithë angazhimin tonë” me Ukrainën. Megjithatë, ai vuri në dukje se ende nuk ka “asnjë fitore, asnjë marrëveshje përfundimtare”.
Ministri i Jashtëm francez i përshkruan bisedimet e Gjenevës për Ukrainën si konstruktive dhe të dobishme. “Puna vazhdon për të krijuar kushtet për një paqe që respekton sovranitetin e Ukrainës dhe garanton interesat dhe sigurinë e Evropës”, vuri në dukje Barrot në një postim në platformën e mediave sociale X.
Qeveria federale gjermane i sheh negociatat që po zhvillohen në Gjenevë për Ukrainën “në parim pozitivisht” dhe e konsideron thelbësore që Bashkimi Evropian të marrë pjesë në proces, veçanërisht në lidhje me pikat që lidhen me sigurinë e saj, tha pak kohë më parë zëvendëszëdhënësi i qeverisë Sebastian Hille.
