Sekretari i Përgjithshëm i Partisë Liberal, Tedi Blushi, ka reaguar pas deklaratës së kryeministrit Edi Rama në podcastin “Flasim” mbi vendimin për të mos shkarkuar zv/kryeministren Belinda Balluku.
Në një postim në Facebook, Blushi e ka akuzuar Ramën për dy standarde, duke kujtuar rastet kur ai kishte shkarkuar ministra për shkelje të vogla, ndërsa nuk po vepron ndaj Ballukut, të cilën e konsideron përgjegjëse për keqpërdorime të mëdha financiare në projekte infrastrukturore.
Postimi i Tedi Blushit:
“I njëjti Edi Rama që shkarkoi një Zv/ministre vetëm pse pranoi dhuratë një arkë me peshk apo një tjetër pse piu një cigare në një ambient publik, sot refuzon të shkarkojë një Zv/kryeministre të kapur me “presh në dorë” për vjedhjen e qindra miliona euro.
I njëjti Edi Rama që i “dhemb zemra” për Kushtetutën, ndërkohë që ndër vite Gjykata Kushtetuese e ka çertifikuar si shkelësin më të madh të saj, nga vendimi për Teatrin Kombëtar, te ligjet e qepura me porosi për oligarkët e deri te mandati i Olta Xhaçkës.
Është i njëjti “dashnor” i Kushtetutës që Komisioni i Venecias e ka damkosur të paktën pesë herë për shkelje të saj.
I njëjti Kryeministër që donte të shkarkonte Presidentin e Republikës pse mbronte Kushtetutën, tani kërkon të mos shkarkojë Zv/Kryeministren që e çoi kilometrin e rrugëve të florinjta, që shemben si thes kashte, 5-6 herë më shtrenjtë se në vendet e BE.
Sot, Edi Rama nuk po mbron Kushtetutën.
Kërkon të mbrojë bashkëvjedhjet dhe hajdutëritë e veta me duart e Belindës, e cila mesa duket është gati t’i zbulojë të gjitha, nëse Kryeministri do të guxojë ta braktisë.
Kaq është e vërteta!”
