Air Albania nuk ka kryer asnjë fluturim më 8 dhe 9 dhjetor, sipas të dhënave të TIA. Agjencitë e udhëtimit pohojnë se nga e shtuna kompania ka pezulluar operacionet, duke detyruar pasagjerët të udhëtojnë përmes Prishtinës apo Podgoricës.
Ndërkohë, në sistem fluturimet ende rezultojnë aktive dhe kompania thotë se do të rifillojë operacionet të martën. Aktualisht po shiten bileta vetëm për Stambollin.
Problemet lidhen me vendimin e Turkish Airlines për të shitur 49% të aksioneve të saj në Air Albania, çka ka shkaktuar paqartësi në bashkëpunimin operacional. Air Albania, e themeluar në 2018, ka humbur terren ndaj linjave low-cost dhe në 2024 ka rënë në 3.4% të tregut.
