Kryetari i Partisë Demokratike, Sali Berisha, ka reaguar pas zhvillimeve të fundit në hetimet ndaj zv.kryeministres Belinda Balluku.
Gjatë një konference për mediat, Berisha bëri të ditur se dosja që rëndon mbi Ballukun është ndarë në dy çështje, një për të dhe një tjetër për kryeministrin Edi Rama. Ai i kërkoi SPAK-ut të vazhdojë hetimet pa ndikime politike dhe të trajtojë me seriozitet përgjegjësitë që lindin nga kjo dosje.
“Edi Rama ka hallin se është në radhë, është në radhë pas Lubisë. Është ndarë dosja dysh, dosja e Lubisë dhe dosja e Ramës. Nuk mund të flejë më dosja e Ramës dhe ai po bën gjithçka për të përdorur Lubinë si pasmore. Ky është një tjetër tentativë për të shmangur përgjegjësinë. Edhe një javë më parë, ky mashtrues publik, i kapur në qark me vjedhjen e Tunelit të Llogarasë, citoi kushedi sa herë Komisionin e Venecias, duke thënë se ky komision ka dhënë opinione që nuk mund të pezullohen ministra. Por tani, ka katër ditë që nuk e përmend më Komisionin e Venecias, duke u bërë kështu një njeri i pashpresë,” theksoi Berisha.
