Një tragjedi e patregueshme në Hollywood merr karakteristikat e një drame familjare, me vrasjen brutale të regjisorit të famshëm Rob Reiner dhe gruas së tij.
Regjisori, producenti dhe aktori me famë botërore, Rob Reiner dhe bashkëshortja e tij, Michelle Singer Reiner, u gjetën të vdekur të dielën pasdite në shtëpinë e tyre luksoze në lagjen Brentwood të Los Angeles, në një rast që policia po e heton si vrasje të dyfishtë.
Trupat e dy viktimave u zbuluan afërsisht në orën 3:30 të pasdites sipas kohës lokale, kur Departamenti i Zjarrfikësve të Los Anxhelosit (LAFD) iu përgjigj një thirrjeje për ndihmë mjekësore në shtëpinë në pronësi të Reiner. Sipas autoriteteve, kur mbërritën në vendngjarje, gjetën dy të moshuar – një burrë afërsisht 78 vjeç dhe një grua afërsisht 68 vjeç – pa ndjenja brenda banesës, raportoi NBC amerikane.
Indikacionet fillestare tregojnë se dy viktimat pësuan lëndime që përputhen me goditjet me thikë. Divizioni i Grabitjeve dhe Vrasjeve i LAPD-së po heton ende incidentin, por të gjitha raportet e medias në shtypin amerikan tregojnë për një tragjedi familjare pasi sulmi vrasës dyshohet se është kryer nga djali i çiftit fatal, Nick Reiner, i cili i goditi për vdekje me thikë ata.
Sipas raportimeve nga burime gazetareske, vajza e çiftit, Romy Reiner, e cila jeton në një rezidencë përballë rezidencës së prindërve të saj, ishte ajo që gjeti trupat brenda shtëpisë dhe njoftoi autoritetet. Ajo ishte e para që u përball me pamjen tragjike.
Kur hyri në shtëpi, u përball me një skenë tronditëse. Prindërit e saj u gjetën brenda në shtëpi, pa ndjenja. Sipas vlerësimeve fillestare nga autoritetet, ata kishin lëndime të dukshme nga një objekt i mprehtë, gjë që bëri që shërbimet e emergjencës të njoftonin menjëherë Departamentin e Policisë së Los Anxhelosit.
Romy, në gjendje shoku, telefonoi autoritetet, ndërsa ndihmësit e Departamentit të Zjarrfikësve të Los Anxhelosit (LAFD) mbërritën në vendngjarje pak para orës 3:40 të pasdites. Disa minuta më vonë, u thirr policia e Los Anxhelosit pasi u bë e qartë se shkaku i vdekjes nuk ishte natyror.
Burime policore thanë se zona nuk tregoi shenja të një vjedhjeje me thyerje apo përleshjeje në shkallë të gjerë, gjë që përforcoi skenarin se autori i krimit i njihte viktimat ose kishte qasje në shtëpi.
Guvernatori i Kalifornisë, Gavin Newsom, ish-kandidatja presidenciale Kamala Harris dhe ish-Presidenti Barack Obama ishin midis demokratëve që i bënë homazhe Reiner të dielën në mbrëmje. “Unë dhe Jen jemi të shkatërruar nga humbja tragjike e Rob Reiner dhe Michelle Singer Reiner”, shkroi Newsom.
