Presidenti i Shteteve të Bashkuara të Amerikës, Donald Trump ka nënshkruar një urdhër ekzekutiv që synon të bllokojë gjykatat ose kreditorët nga sekuestrimi i të ardhurave të lidhura me shitjen e naftës venezueliane të mbajtura në llogaritë e Thesarit të vendit, njoftoi Shtëpia e Bardhë.
“Presidenti Trump po parandalon konfiskimin e të ardhurave nga nafta venezueliane, gjë që mund të minojë përpjekjet kritike të SHBA-së për të siguruar stabilitet ekonomik dhe politik në Venezuelë“, tha Shtëpia e Bardhë.
Në urdhrin e emergjencës thuhet se të ardhurat, të mbajtura në fondet e depozitave të qeverive të huaja, duhet të përdoren në Venezuelë për të ndihmuar në krijimin e “paqes, prosperitetit dhe stabilitetit”. Urdhri u nënshkrua të premten, më pak se një javë pasi forcat amerikane kapën udhëheqësin venezuelian Nicolas Maduro në Karakas.
Urdhri nuk përmend ndonjë kompani specifike, por deklaron se paratë janë pronë sovrane e Venezuelës, të mbajtura në kujdestarinë e SHBA-së për qëllime qeveritare dhe diplomatike dhe nuk i nënshtrohen pretendimeve private.
Një marrëveshje e SHBA-së me udhëheqësit e përkohshëm të Venezuelës do t’i siguronte deri në 50 milionë fuçi naftë të papërpunuar SHBA-së, ku rafineri të shumta janë të pajisura posaçërisht për ta rafinuar atë.
Trump përmendi Aktin Ndërkombëtar të Fuqive Ekonomike të Emergjencave të vitit 1977 dhe Aktin Kombëtar të Emergjencave të vitit 1976 si një justifikim ligjor.
