Kina ka bërë të ditur se është e përgatitur të kontribuojë në mënyrë aktive për zbutjen e tensioneve që lidhen me Iranin, duke paralajmëruar se përshkallëzimi i konflikteve rrezikon të rikthejë marrëdhëniet ndërkombëtare në një “ligj të xhunglës”.
Në një bisedë telefonike me homologun e tij iranian, ministri i Jashtëm kinez Wang Yi theksoi se Pekini kundërshton përdorimin ose kërcënimin me forcë dhe mbetet i vendosur kundër çdo përpjekjeje për imponim politik apo ushtarak ndaj vendeve të tjera.
Ai shprehu mbështetjen e Kinës për përpjekjet e Iranit në ruajtjen e stabilitetit të brendshëm dhe mbrojtjen e interesave të tij legjitime, duke vlerësuar se Teherani do të jetë në gjendje të kapërcejë sfidat aktuale.
Wang Yi u bëri thirrje palëve të përfshira të tregojnë vetëpërmbajtje dhe të zgjedhin dialogun si rrugë zgjidhjeje, duke nënvizuar se Kina është e gatshme të luajë një rol lehtësues për uljen e tensioneve.
