Anëtarët e Kuvendit kanë rikthyer punën pas pushimeve, duke nisur me mbledhjen e Konferencës së Kryetarëve për shqyrtimin e kalendarit dhe programit të punës për 5 javët e ardhshme. Deputetët do të mblidhen gjithashtu në seancë plenare në orën 17:00.
Një nga çështjet kryesore pritet të jetë debatimi për arrestimin e ministres Belinda Balluku, për të cilën Këshilli i Imunitetit do të mblidhet më 28 janar, ndërsa Kushtetuesja zhvillon seancë më 22 janar.
Përsa i përket reformave, ato zgjedhore dhe territoriale mbeten pezull, me socialistët që kërkojnë mbylljen e tyre para korrikut. Opozita ka bojkotuar këto reforma që në dhjetor dhe nuk është ende gati të rikthehet në tryezë. Socialistët kërcënojnë me zbatimin e planit të tyre pa konsensus, ndërsa BE ka kërkuar gjithëpërfshirje. Po ashtu, PS ka shprehur ambicie për një reformë të plotë kushtetuese brenda mandatit.
