Partia Demokratike ka kërkuar një reagim të menjëhershëm nga të gjitha institucionet e drejtësisë dhe aktorët politikë, pas sinjaleve të rrezikshme që, sipas saj, vijnë nga SHBA dhe BE për situatën e sigurisë në Shqipëri.
Në një deklaratë për mediat, PD thekson se situata alarmante e krijuar nga qeveria e Edi Ramës, e cilësuar si “narkoshtet”, kërkon një angazhim të shpejtë dhe të koordinuar për të zbatuar strategjitë ndërkombëtare kundër trafikut të drogës dhe pastrimit të parave.
Deklarata e zëdhënëses së PD, Floriana Garo:
Në vijim të deklaratës së djeshme për seancën dëgjimore në Kongresin Amerikan, Partia Demokratike thekson domosdoshmërinë që institucionet e drejtësisë, Parlamenti dhe aktorët politikë e shoqërorë, jo vetëm të dëgjojnë atë që vjen si kambanë alarmi nga kancelaritë më të larta, të Uashingtonit, Brukselit etj., por edhe të pozicionohen, të reagojnë dhe të përballen me rrezikun e narkoshtetit që ka instaluar Edi Rama dhe qeveria e tij në Shqipëri.
Strategjia anti-karteleve të drogës të Presidentit Trump, e ritheksuar disa herë edhe nga Ambasada Amerikane në Tiranë, edhe nga të dërguarit e Departamentit të Shtetit etj., duhet të zbatohet në Shqipëri me urgjencë. Një vend anëtar i NATO, kandidat për BE, nuk mund të jetë njëkohësisht një narko-shtet që hap dhe lehtëson rrugët e trafikut ndërkombëtar të drogës dhe pastrimit të parave, të cilat cenojnë sigurinë kombëtare, rajonale dhe europiane.
Në vijim do të lexoj sot 2 pyetje-përgjigje të Kryetarit të nënKomisionit për Europën në Kongresin Amerikan, Keith Self, për Profesorin e ‘John Hopkins University’ dhe ekspertin e Ballkanit, Joseph Eduards:
Pyetja 3: Si duhet të reagojë komuniteti ndërkombëtar ndaj shndërrimit të Shqipërisë në një qendër të trafikut dhe pastrimit të parave?
Trafikimi dhe pastrimi i parave përbëjnë kërcënim të drejtpërdrejtë për interesat e SHBA-së dhe NATO-s dhe pasqyrojnë një patologji më të thellë në sistemin e qeverisjes në Shqipëri. Bashkimi i interesave të partisë në pushtet, institucioneve shtetërore dhe krimit të organizuar është në zemër të këtij problemi.
Siç dokumentohet nga raportime hetimore dhe sanksione të OFAC, krimi i organizuar ka depërtuar në strukturat politike dhe ka ndikuar në proceset zgjedhore. Lejimi i vazhdimit të këtij fenomeni rrezikon destabilizim të mëtejshëm në Evropë dhe hapësirën transatlantike.
Pyetja 4: Si duhet ta vlerësojë SHBA implikimin e sigurisë nga ekonomia e paligjshme e Shqipërisë?
Raportimet e Departamentit të Shtetit tregojnë se SHBA është e vetëdijshme për rreziqet e sigurisë që burojnë nga roli i Shqipërisë si nyje e krimit të organizuar. Flukset financiare të paligjshme minojnë stabilitetin rajonal, lehtësojnë ndikime keqdashëse dhe komprometojnë krahun juglindor të NATO-s.
Sfida tani është përkthimi i kësaj vetëdijeje në veprim politik konkret.
