Presidenti i Shteteve të Bashkuara, Donald Trump, ka rritur tensionet lidhur me Groenlandën, duke deklaruar në rrjetet sociale se “nuk ka më kthim pas” dhe se “Groenlanda është thelbësore” për interesat strategjike të SHBA-së.
Gjatë një konference për shtyp në Shtëpinë e Bardhë, Trump u pyet për gatishmërinë e tij për të siguruar kontrollin mbi këtë territor autonom danez dhe u përgjigj me një frazë të paqartë: “Do ta merrni vesh”.
Deklaratat e tij kanë shkaktuar reagime të forta në nivel ndërkombëtar. Presidenti francez Emmanuel Macron e cilësoi këtë veprim si një “zhvendosje drejt një bote pa rregulla”, ndërsa kryeministri kanadez, Mark Carney, theksoi se “rendi i vjetër botëror nuk do të kthehet më”.
Trump kishte planifikuar të merrte pjesë në Forumin Ekonomik Botëror në Davos të Zvicrës, por udhëtimi i tij u anulua kur avioni presidencial, Air Force One, u detyrua të kthehej mbrapsht për shkak të një defekti elektrik të vogël.
