Ministria e Mbrojtjes e Kinës ka njoftuar nisjen e një hetimi ndaj gjeneralit të lartë, Zhang Youxia, për shkelje të rënda të disiplinës dhe ligjit.
Zhang, aleati më i ngushtë ushtarak i Presidentit Xi Jinping dhe nënkryetar i Komisionit Qendror Ushtarak, po hetohet për akuza që lidhen kryesisht me korrupsionin, një problem që ka dominuar luftën e Presidentit Xi kundër korrupsionit në nivelet e larta të administratës dhe ushtrisë.
Sipas Ministrisë, hetimi përfshin gjithashtu një tjetër oficer të lartë, Gjeneralin Liu Zhenli. Ky pastrim vjen pas largimit të nëntë gjeneralëve të tjerë të lartë në tetor, duke shënuar një nga spastrimet më të mëdha publike të ushtrisë në dekadat e fundit.
Zhang, i cili është gjithashtu anëtar i Byrosë Politike të Partisë Komuniste, ka shërbyer për më shumë se 50 vjet në ushtri dhe ka mbajtur pozita të larta, pavarësisht moshës së tij prej 75 vjeçare.
Ky hetim është pjesë e fushatës të Presidentit Xi Jinping për të pastruar ushtrinë dhe administratën nga korrupsioni, një kërcënim i konsideruar si një rrezik i madh për stabilitetin e Partisë Komuniste.
