Shefja e politikës së jashtme të Bashkimit Evropian, Kaja Kallas, i bëri thirrje Shteteve të Bashkuara të përmbahen nga sulmet ndaj Iranit, duke theksuar se rajoni nuk ka nevojë për një “luftë të re”.
Komentet e saj pasuan vendimin e BE-së për të përfshirë Trupën e Gardës Revolucionare Islamike (IRGC) në listën e organizatave terroriste, një hap që ka rritur tensionet mes Bashkimit Evropian dhe Iranit, pas shtypjes brutale të protestave në këtë vend.
“Rajoni nuk ka nevojë për një luftë të re,” tha Kallas, duke shtuar se ky vendim do të ushtronte presion mbi regjimin iranian.
Nga ana e tij, Ministri i Jashtëm iranian, Abbas Araghchi, e cilësoi këtë si një “marifet PR” që synonte të fshehë krizën e brendshme të BE-së, duke paralajmëruar se një luftë kundër Iranit do të kishte pasoja të rënda për Evropën.
Në të njëjtën linjë, Presidenti i SHBA-së, Donald Trump, paralajmëroi se një “armadë masive” po udhëton drejt Iranit, duke theksuar se SHBA-të janë të gatshme të veprojnë me forcë nëse është e nevojshme.
