Negociatorët amerikanë dhe ukrainas kanë diskutuar një qëllim ambicioz për arritjen e një marrëveshjeje paqeje midis Moskës dhe Kievit deri në mars, megjithëse afati kohor mund të ndryshojë pasi mosmarrëveshjet mbi çështjen thelbësore territoriale vazhdojnë, sipas tre burimeve të cituara nga Reuters.
Sipas kuadrit të diskutuar nga të dyja palët, çdo marrëveshje do të vihet në një referendum dhe në të njëjtën kohë votuesit ukrainas do të thirren të votojnë në zgjedhjet e tyre kombëtare, thanë pesë burime me njohuri për çështjen që kërkuan të mos identifikoheshin.
Ekipi amerikan, i udhëhequr nga i dërguari special Steve Witkoff dhe dhëndri i Presidentit Donald Trump, Jared Kushner, u tha ukrainasve në kontaktet e fundit në Abu Dhabi dhe Miami se do të ishte e preferueshme që zgjedhjet të mbaheshin së shpejti, sipas tre prej këtyre burimeve.
Negociatorët amerikanë thonë se Donald Trump ka të ngjarë të përqendrohet në çështjet e brendshme ndërsa afrohen zgjedhjet e mesit të mandatit të nëntorit, që do të thotë se zyrtarët amerikanë do të kenë më pak kohë dhe kapital politik për të investuar në arritjen e një marrëveshjeje paqeje, thanë dy burime.
Raundi i dytë i negociatave në Abu Dhabi rezultoi vetëm në shkëmbimin e 314 të burgosurve të luftës dhe një premtim për të rifilluar bisedimet së shpejti. Presidenti ukrainas Volodymyr Zelensky tha se trepalëshi i ardhshëm mund të zhvillohet së shpejti në Shtetet e Bashkuara.
Dy nga burimet thanë se amerikanët dhe ukrainasit kishin diskutuar mundësinë e mbajtjes së zgjedhjeve dhe referendumit në maj. Megjithatë, disa burime të tjera e përshkruan afatin kohor si “imagjinativ”.
Autoritetet ukrainase vlerësojnë se do të duhen rreth gjashtë muaj për të organizuar zgjedhjet, në rrethanat aktuale, me një nga burimet që thekson se “amerikanët janë me nxitim ” .
Mbajtja e zgjedhjeve do të kërkonte ndryshime në ligj, pasi ato janë të ndaluara ndërsa në vend është në fuqi ligji i luftës. Një problem tjetër është kostoja e lartë.
Ukraina dëshiron një armëpushim gjatë gjithë fushatës për të mbrojtur integritetin e referendumit dhe është e shqetësuar se Kremlini nuk po e mban fjalën e dhënë për armëpushimet e rëna dakord.
“Pozicioni i Kievit është se asgjë nuk mund të arrihet derisa të zbatohen garancitë e sigurisë për Ukrainën nga SHBA-të dhe partnerët e tjerë”, tha një burim.
