Pak para nisjes së protestës kombëtare në Tiranë, Tedi Blushi, Sekretar i Përgjithshëm i Partisë së Lirisë, i bëri thirrje qytetarëve të dalin masivisht dhe të shprehin pakënaqësinë e tyre ndaj qeverisë.
Ai e përshkroi këtë tubim si një mundësi për të kërkuar llogaridhënie dhe për të treguar zemërimin qytetar ndaj atyre që, sipas tij, po dëmtojnë të ardhmen e shqiptarëve.
Postimi i Tedi Blushit:
“Sot është dita e revoltës dhe e zemërimit qytetar, dita e guximit, e llogaridhënies dhe e përballjes pa kthim me Narkoregjimin.
Sot, të gjithë shqiptarët e lirë, të ndershëm dhe patriotë bashkohen në Bulevardin para Kryeministrisë, sepse durimi ka marrë fund, frika ka marrë fund dhe koha e nënshtrimit ka përfunduar.
Sot, në ora 17:00, zëri i gjithë Shqipërisë do gjëmojë në Tiranë.
Të gjithë para Kryeministrisë, në protestën kombëtare kundër grupit të strukturuar kriminal që ka rrëmbyer shtetin, po u vjedh taksat qytetarëve dhe po grabit të ardhmen e shqiptarëve.
Sot është dita për të qenë aty! Sot është dita për të mos munguar! Sot është dita për të tronditur nga themelet Narkoregjimin!”.
