Kryeprokurorja Kimberly West përmbylli sot seancën në Hagë, duke vlerësuar masën e madhe të provave dhe dëshmive të paraqitura gjatë gjykimit.
Ajo theksoi se drejtësia dhe llogaridhënia ndaj viktimave, që kanë vuajtur pasojat e krimeve për mbi 20 vite, janë thelbësore dhe askush nuk mund të jetë mbi ligjin.
“Gjatë 227 ditëve të gjykimit, janë shqyrtuar mbi 5 mijë prova dhe dëshmia e më shumë se 130 dëshmitarëve. Ka qenë një privilegj për mua dhe zyrën që përfaqësoj të takoja viktimat që kanë përjetuar këto krime për më shumë se 20 vite. Askush nuk është mbi ligjin. Drejtësia duhet të garantojë përgjegjësinë, përfshirë edhe personat më të fuqishëm. Këto përpjekje dhe procedime penale janë pjesë e parimit themelor të shtetit ligjor dhe të drejtësisë, dhe ne kërkojmë që bazuar në prova të jepet dënimi i duhur për ata që kanë kryer këto krime.”
