Presidenti francez Emmanuel Macron ka bërë thirrje që Bashkimi Evropian të ndërmarrë masa të reja për të ulur varësinë nga dollari amerikan dhe për të forcuar konkurrencën industriale të kontinentit. Ai sugjeroi krijimin e një instrumenti të përbashkët huamarrjeje, të ngjashëm me euroobligacionet, si një mënyrë për të mbështetur investimet strategjike dhe zhvillimin e sektorëve kyç.
“Evropa nuk mund të humbasë mundësitë për investime teknologjike dhe duhet të mbrojë sektorët strategjikë për të qëndruar konkurruese ndaj SHBA-së dhe Kinës,” deklaroi Macron gjatë intervistës për disa media evropiane. Presidenti francez theksoi se niveli i huamarrjes së Bashkimit Evropian është më i ulët krahasuar me atë të Shteteve të Bashkuara dhe Kinës, duke u shprehur se kjo mund të dëmtojë aftësinë e Evropës për të investuar në teknologjitë e gjelbra, digjitale dhe në mbrojtjen strategjike.
Macron gjithashtu vuri në dukje sfidat gjeopolitike dhe tregtare me të cilat përballet Evropa, duke përmendur edhe incidentet e fundit që tregojnë se kontinenti duhet të jetë i përgatitur për të mbrojtur interesat e tij strategjike.
Ai nënvizoi se Bashkimi Evropian duhet të thjeshtojë rregulloret, të thellojë tregun e brendshëm dhe të diversifikojë partnerët tregtarë për të shmangur varësinë nga fuqitë e mëdha globale.
