Ministri i Jashtëm i Shteteve të Bashkuara, Marco Rubio, ka reaguar ndaj një raporti të pesë shteteve europiane që akuzon Rusinë për vrasjen e liderit të opozitës ruse, Alexei Navalny.
Sipas raportit, Navalny u helmua me një toksinë të nxjerrë nga bretkosa helmuese me shigjeta, një substancë që nuk gjendet natyrshëm në Rusi. Rubio e quajti raportin “shqetësues”, por theksoi se Shtetet e Bashkuara nuk kanë arsye ta vënë në dyshim atë.
Në një konferencë për shtyp në Bratislavë, gjatë vizitës së tij në Sllovaki, Rubio sqaroi se Uashingtoni nuk u bashkua me deklaratën e pesë vendeve – Britanisë së Madhe, Francës, Gjermanisë, Suedisë dhe Holandës – për shkak se ajo ishte një nismë e këtyre shteteve.
Ai theksoi se, pavarësisht se SHBA nuk mori pjesë në nismë, nuk ka asnjë dyshim mbi përfundimet e saj.
Ndërkohë, Rusia ka hedhur poshtë akuzat, duke i cilësuar ato si “mashtrim propagandistik perëndimor.” Alexei Navalny ndërroi jetë në shkurt të vitit 2024 në një burg në Arktik, pas një dënimi për ekstremizëm dhe akuza të tjera, të cilat ai i kishte mohuar gjithmonë.
