Kreu i Grupit Parlamentar të Partisë Demokratike, Gazment Bardhi, ka kërkuar me urgjencë që Kuvendi të shqyrtojë kërkesën e SPAK për heqjen e imunitetit të zëvendës kryeministres Belinda Balluku.
Ai akuzoi mazhorancën se ka vonuar për të dy muaj radhazi këtë çështje, duke penguar hetimet për korrupsionin dhe duke shkelur funksionin e Kuvendit. Bardhi theksoi se është koha që ky institucion të përmbushë detyrën e tij dhe t’i hapë rrugë drejtësisë.
“Kuvendi duhet të ketë vetëm një çështje në rendin e ditës: shqyrtimin e kërkesës për heqjen e imunitetit të Belinda Ballukut. Ju e keni shtyrë për dy muaj dhe keni penguar hetimet. Pas vendimit të Gjykatës Kushtetuese, nuk ka asnjë arsye për të vonuar më. Ky Kuvend ka dështuar në detyrën e tij dhe po bëhet pjesë e bllokimit të drejtësisë. Jeni të vetmit që miratoni ligje për t’u mbrojtur dhe kjo është e papranueshme. Duhet të mbledhim urgjentisht një seancë për të dhënë dritën e gjelbër për hetimet, sepse korrupsioni po shkatërron institucionet tona.”
