Irani thotë se nuk po sulmon vendet e Lindjes së Mesme, por bazat dhe instalimet amerikane që ndodhen në territorin e tyre. Këtë e deklaroi ministri i Jashtëm iranian Abbas Araghchi gjatë një interviste për NBC.
Sipas tij, objektivat e Teheranit janë vetëm burimet ushtarake të SHBA-së, të cilat “fatkeqësisht ndodhen në territorin e fqinjëve tanë”. Ai theksoi se Irani po reagon ndaj sulmeve që, sipas tij, kanë nisur nga Shtetet e Bashkuara dhe Izraeli.
Araghchi tha gjithashtu se presidenti iranian Masoud Pezeshkian u ka kërkuar falje vendeve arabe që janë prekur nga sulmet iraniane, për “vështirësitë që kanë përjetuar si pasojë e agresionit amerikan dhe kundërpërgjigjes së Iranit”.
Ministri iranian shtoi se është Donald Trump ai që duhet të kërkojë falje për “vrasjet dhe shkatërrimet” në rajon.
Sa i përket mundësisë për armëpushim, Araghchi tha se para se Irani ta shqyrtojë një gjë të tillë, SHBA dhe Izraeli duhet të shpjegojnë pse nisën sulmet. Sipas tij, lufta i është imponuar Iranit dhe veprimet e Teheranit janë “akte të ligjshme vetëmbrojtjeje”.
