Kryeministri britanik, Keir Starmer, ka njoftuar se qeveria e Mbretërisë së Bashkuar po punon së bashku me aleatët evropianë për të zhvilluar një plan të përbashkët, që synon rihapjen e Ngushticës së Hormuzit, një nga rrugët kryesore për transportin e naftës në botë.
Në një konferencë për shtyp, Starmer theksoi se kjo është një çështje e rëndësishme për stabilitetin e tregut global të energjisë dhe kërkon koordinim ndërkombëtar.
“Ne kemi ndërmarrë tashmë masa emergjente, duke bashkëpunuar me vendet e tjera për të liruar rezervat e naftës në një nivel të paprecedentë. Megjithatë, për të siguruar një stabilitet të qëndrueshëm, Ngushtica e Hormuzit duhet të rihapet,” tha Starmer, duke theksuar rëndësinë e rikthimit të lirisë së lundrimit për të stabilizuar tregun global të energjisë.
Kryeministri britanik sqaroi gjithashtu se ky është një proces kompleks, që kërkon koordinim të ngushtë me aleatët, përfshirë partnerët evropianë.
Ai theksoi se përpjekjet për të stabilizuar situatën po zhvillohen me shpejtësi, por paralajmëroi se rikthimi i lirisë së kalimit në Ngushticë do të kërkojë kohë dhe bashkëpunim të vazhdueshëm nga të gjitha palët e përfshira.
