Autoritetet ushtarake iraniane kanë mohuar kategorikisht pretendimet për zhvillimin e negociatave me Shtetet e Bashkuara, duke kundërshtuar deklaratat e fundit të presidentit amerikan Donald Trump për një “bisedë shumë të mirë”.
Sipas qëndrimeve që vijnë nga radhët e ushtrisë iraniane, nuk ekziston asnjë proces negociator në zhvillim dhe as tentativa reale për arritjen e një marrëveshjeje armëpushimi njëmujore, siç është raportuar nga pala amerikane.
Një zëdhënës ushtarak iranian, duke komentuar këto pretendime, ironizoi Uashingtonin me tone të ashpra, duke deklaruar se një vend që e konsideron veten “superfuqi globale” do të ishte tërhequr tashmë nga konflikti nëse do të kishte mundësi.
Ai shtoi se Shtetet e Bashkuara po përpiqen të maskojnë një dështim si një marrëveshje, ndërsa theksoi se “epoka e premtimeve boshe ka marrë fund”. Në deklaratën e tij, zëdhënësi vuri në dukje gjithashtu tensionet e brendshme në SHBA, duke sugjeruar se ato kanë arritur në një pikë ku “po negociojnë me vetveten”.
