Garda Revolucionare Islamike ka reaguar ashpër ndaj deklaratave të presidentit amerikan Donald Trump, duke theksuar se Ngushtica e Hormuzit nuk do të hapet për “armiqtë e Iranit” përmes asaj që e cilëson si “lëvizje qesharake për efekt”.
Në një deklaratë zyrtare të publikuar të mërkurën, Garda Revolucionare u shpreh se situata në këtë korridor strategjik mbetet plotësisht nën kontroll.
“Dëshirojmë gjithashtu t’i kujtojmë popullit fisnik dhe historik të Iranit islamik se situata në Ngushticën e Hormuzit është në mënyrë të qëndrueshme dhe të plotë nën kontrollin e forcave detare të Gardës së Revolucionit”, thuhet në deklaratë.
Reagimi vjen pasi më herët gjatë ditës, Trump deklaroi se lideri i ri i Iranit i kishte kërkuar SHBA-së armëpushim, duke shtuar se Uashingtoni do të pranojë vetëm nëse hapet kalimi në Ngushticën e Hormuzit.
Tensionet në rajon mbeten të larta, ndërsa deklaratat e ndërsjella sinjalizojnë përshkallëzim të retorikës mes palëve.
