Ambasadori i Bashkimit Evropian në Shqipëri, Silvio Gonzato, zhvilloi një takim me Ministrin e Drejtësisë, Toni Gogu, ku u diskutuan sfidat dhe nevojat që përballen institucionet e drejtësisë në Shqipëri.
Ky takim i rëndësishëm fokusohej në përmirësimin e efikasitetit të sistemit të drejtësisë, forcimin e garancive procedurale dhe thellimin e luftës kundër krimit të organizuar dhe korrupsionit.
“Sot zhvilluam një takim të mirë me Ministrin e Drejtësisë, Toni Gogu, mbi sfidat kryesore me të cilat përballet sistemi i drejtësisë në Shqipëri. Në qendër të diskutimit ishte nevoja për të mbështetur sistemin e drejtësisë për të rritur efikasitetin, për të përmirësuar aksesin e qytetarëve shqiptarë në drejtësi dhe për të forcuar garancitë procedurale. Diskutuam gjithashtu se si Bashkimi Evropian mund ta mbështesë sistemin gjyqësor në arritjen e këtyre objektivave, duke forcuar njëkohësisht luftën kundër krimit të organizuar dhe korrupsionit,” tha Ambasadori i BE-së, Silvio Gonzato.
