Në një periudhë kyçe për procesin e integrimit të Shqipërisë në Bashkimin Europian, deputetja e Partisë Demokratike, Jorida Tabaku, ka paralajmëruar se ky është momenti i “ditës së llogarisë” për vendin.
Ajo ka theksuar se Shqipëria ndodhet përballë sfidave të rëndësishme, ku nuk mjaftojnë vetëm deklaratat politike, por kërkohen rezultate konkrete për të përmbushur standardet dhe normat europiane që janë vendimtare për vazhdimin e procesit të integrimit.
“Ky është një moment prove për Shqipërinë, ku nuk mjaftojnë vetëm deklaratat politike, por kërkohen rezultate konkrete në standarde, vlera dhe norma europiane që të mbështesin një integrim të vërtetë. Shqipëria është përballë një realiteti ku korrupsioni ka marrë përmasa sistemike dhe kjo ka ndikuar në funksionimin e ekonomisë dhe konkurrencës. Në këtë kuadër, duhet të bëjmë më shumë në drejtim të forcimit të shtetit të së drejtës dhe eliminimit të padrejtësive që ndikojnë në çdo aspekt të jetës sonë,” theksoi Tabaku, duke theksuar gjithashtu hendekun ekonomik të madh midis Shqipërisë dhe BE-së.
