Presidenti i Republikës, Bajram Begaj, mori pjesë në kremtimin e Pashkëve ortodokse në Korçë, ku vizitoi kishat e vjetra të Voskopojës dhe më pas u prit në katedralen “Ngjallja e Krishtit”.
Gjatë urimit të tij, Begaj theksoi rëndësinë e solidaritetit dhe mirësisë në shoqëri, duke shprehur dëshirën që drita e Pashkëve të ndriçojë zemrat e njerëzve dhe të sjellë harmoni midis shqiptarëve.
“Jam sot shumë i gëzuar që gjendem në Korçë për të uruar nga Mitropolia e Korçës të gjithë besimtarët ortodoksë: Gëzuar Pashkët! Qoftë një Pashkë e bekuar për të gjithë besimtarët, por edhe për të gjithë shqiptarët. Uroj që drita e qiriut, e marrë mbrëmë në kishë, të ndriçojë zemrat e çdo individi, çdo besimtari dhe të gjithë shoqërisë sonë, dhe të bëhemi më të mirë me njëri-tjetrin, më solidarë me njëri-tjetrin dhe më të mbarë për njëri-tjetrin.”
