Tirana do të presë një nga ngjarjet më të mëdha kombëtare, Samitin e Katërt të Diasporës, që synon të bashkojë shqiptarët dhe komunitetet shqiptare anembanë botës, duke forcuar lidhjet e tyre.
Për tre ditë, kryeqyteti shqiptar do të shndërrohet në një qendër politike, ekonomike dhe kulturore, nën moton “Përmes rrënjeve lartësohemi”.
Presidenti i Shqipërisë, Bajram Begaj, do të nderojë figura të shquara shqiptare të diasporës që kanë kontribuar në forcimin e lidhjeve mes Shqipërisë dhe shqiptarëve jashtë saj. Samiti do të kulmojë më 14 prill me fjalime nga Kryeministri Edi Rama dhe Ministri i Jashtëm Ferit Hoxha.
Ngjarja do të shoqërohet me panele diskutimi për kontributin e diasporës shqiptare në fusha të ndryshme si ekonomi, politikë, kulturë, teknologji dhe biznes.
