Mjetet e ndara nga Qeveria e Kosovës për subvencionimin e tarifave të reja të energjisë elektrike janë vetëm për këtë vit. Nëse Qeveria s’ndan mjete të tjera, tre muajt e parë të vitit të ardhshëm qytetarët do të paguajnë vetë gjithë faturën, e që do jetë shumë më shtrenjtë, raporton Express.
Me tarifat e reja, energjia është shtrenjtuar për qytetarët që shpenzojnë mbi 800 kWh rrymë. Për të zbutur ndikimin e kësaj rritje te qytetarët direkt, Qeveria ka ndarë 90 milionë euro.
“Në mbledhjen e sotme është miratuar propozimi i Ministrisë së Ekonomisë për zotimin e Qeverisë për subvencionimin e pagesës së energjisë nga konsumatorët. Sipas vendimit të miratuar, Qeveria e Republikës së Kosovës është zotuar për subvencionim të energjisë në shumën prej 90.000.000.00 € (nëntëdhjetë milionë euro)”, ka njoftuar Zyra e Kryeministrit, ditë më parë.
Por, mjetet e ndara nga ekzekutivi vlejnë vetëm deri në fund të këtij viti. Në rast se Qeveria e Kosovës s’ndan mjete të tjera, qytetarët do të duhet të paguajnë vetë gjithë faturën në tre muajt e parë të vitit të ardhshëm.
Këtë e ka thënë në “Pressing” të T7, kryesuesi i Bordit të Zyrës së Rregullatorit për Energji, Ymer Fejzullahu.
“…edhe gjatë periudhës së verës kemi nevojë për import shtesë, mirëpo importi gjatë verës është shumë më i ulët dhe për këtë arsye kjo bllok-tarifë do të jetë në fuqi deri në mars të vitit 2023. Subvencioni është për vitin 2022. Këto mjete janë nda për subvencionimin e tarifave për vitin 2022”, ka thënë Fejzullahu në T7.
Edhe në sqarimet shtesë rreth subvencionimit që ka kërkuar Gazeta Express nga ZRrE, ky institucion ka konfirmuar se subvencionimi i qeverisë vlen vetëm për këtë vit.
Gazeta Express ka dërguar pyetje edhe në adresë të Zyrës së Kryeministrit, nëse do të ndahen sërish para për subvencionimin e tarifave edhe në tre muajt e parë të vitit të ardhshëm, por deri në momentin e publikimit të tekstit, s’i ka pranuar përgjigjet.
Ndryshe, me tarifat e miratuara, konsumatorët që shpenzojnë mbi 800 kWh do të duhet të paguajnë 5.9 centë për tarifën e ultë dhe 12.52 centë për tarifën e lartë.
Ata që do të shpenzojnë energji elektrike deri në 800 kWh nuk do të faturohen me çmimin e ri, derisa ata që e kalojnë 800 kWh, me çmimin e ri do t’iu llogaritet vetëm sasia e harxhuar mbi këtë vlerë.
“Tarifat me pakicë të energjisë elektrike për konsumatorët jo familjarë, në kuadër të Shërbimit Universal do të mbesin të njëjta si vitin e kaluar. Tarifat për konsumatorët familjarë, për nivelin e konsumit deri në 800 kËh në muaj, do të mbesin të njëjta, ndërsa diferenca e konsumit mbi 800 kËh për muaj, do të faturohet me tarifën e ulët (gjatë natës) prej 5.9 cent dhe tarifën e lartë (gjatë ditës) prej 12.52 cent. Tarifat e reja do të hyjnë në fuqi me datë 9 shkurt 2022 dhe do të aplikohen deri më 31 mars 2023”, ka njoftuar ZRRE’ja.
Vendimi i ZRRE-së për shtrenjtimin e rrymës, sipas propozimit të LVV-së dhe ministres Rizvanolli
Të njëjtin propozim sikur ky që e miratoi ZRrE e kishte edhe Ministria e Ekonomisë dhe Lëvizja Vetëvendosje.
Ministrja e Ekonomisë, Artane Rizvanolli në komentet dërguar ZRrE-së propozonte që zgjerimin e brezit tarifor në 800 kilovat nga 600 kilovat që ishte propozuar më parë nga ZRrE.
Propozim tjetër i ME-së ishte shtimi i blloqeve tarifore dhe përcaktimin e një tarife më të ulët sesa ajo e propozuar aktualisht për konsumin deri në 1,000kWh.
“Zgjerimi i brezit tarifor, përkatësisht ndryshimin e pragut të bllokut nga 600kËh në 800kËh, duke pasur në konsideratë efektivitetin e këtij mekanizimi në kushtet e mungesës së alternativave tjera të sigurimit të energjisë elektrike për nevoja të ngrohjes nga një pjesë e konsumatorëve; ose Shtimin e numrit të blloqeve tarifore, që do të mundësonte përshkallëzimin e tarifave nëpër blloqe dhe përcaktimin e një tarife më të ulët sesa ajo e propozuar aktualisht për konsumin deri në 1,000kËh”, ka qenë propozimi i Rizvanollit.
Ndërkaq Grupi parlamentar i Lëvizjes Vetëvendosje (LVV), i pati propozuar Zyrës së Rregullatorit për Energji (ZRrE) që blloku i parë tarifor deri në 800 kilovat, mos të ketë shtrenjtim të energjisë elektrike.
Mimoza Kusari – Lila, shefe grupit parlamentar të LVV-së, në një konferencë për media patri deklaruar se grupi i dytë i konsumatorëve që shpenzojnë nga 800 deri në 1 mijë e 400 të kenë një rritje që do të përcaktohet edhe në bazë të subvencionimit të qeverisë.
“Blloku i parë tarifor deri në 800 kilovat për orë, i cili mbulohet nga prodhimi i KEK-ut të mos ketë shtrenjtim të rrymës. Këtu përfshihet edhe subvencionimi i Qeverisë. Ky bllok tarifor përbën 63% të amvisërive në gjithë territorin e Kosovës. Blloku i dytë tarifor nga 800 deri 1400 kilovat të ketë një rritje e cila do të përcaktohet në bazë të subvencioni i Qeverisë dhe llogaritjet e ZRRE-së dhe përfshinë mbi 23% të amvisërive. Më propozimin tonë, dy të tretat e amvisërive kursehen. Blloku i tretë tarifor që do të përfshinte konsumatorët që shpenzojnë mbi 1400 kilovat”, u shpreh deputetja e LVV-së në një konferencë për media.
Si do t’ju llogaritet konsumatorëve fatura e muajit shkurt?
Nga ZRRE’ja dhe KEDS’i e kanë konfirmuar për Gazetën Express se me tarifat e reja do të llogaritet vetëm energjia e shpenzuar nga sot e tutje.
“Tarifat e reja hyjnë në fuqi nga data 9 shkurt 2022 dhe do të jenë të zbatueshme deri me 31 mars 2023”, ka deklaruar Petrit Pepaj i ZRRE’së.
Faturat janë edhe më të shtrenjta se në kalkulatorin e ZRRE-së
Zyra e Rregullatorit për Energji ka publikuar dje një kalkulator, përmes së cilit qytetarët mund të llogarisin faturën mujore me tarifat e reja, që janë miratuar dje. Por, në këtë kalkulator s’është përfshirë fare pjesa e subvencionimit nga Qeveria. Fatura duket më e lirë se çmimi real i saj.
Për këtë janë ngritur shqetësime nga qytetarët nëpër rrjete sociale. Ata thonë se çmimet e energjisë janë më të shtrenjta se që paraqiten në kalkulatorin e ZRRE’së, meqenëse aty figuron vetëm vlera e faturës pas subvencionimit.
Në kalkulatorin që kishte publikuar ZRrE’ja në janar të këtij viti, kur propozohej që të shtrenjtohet rryma për qytetarët që shpenzojnë mbi 600 kËh, ka qenë e përfshirë edhe pjesa e subvencionimit nga ana e Qeverisë.
Express ka pyetur ZRRE’në për arsyen se pse në kalkulator s’është përfshirë edhe pjesa që subvencionohet nga Qeveria, mirëpo deri në momentin e publikimit të tekstit s’ka pranuar përgjigje. /Gazeta Express
