Presidenti Biden ishte i qartë se, nëse Rusia ndërmerr një pushtim të mëtejshëm të Ukrainës, Shtetet e Bashkuara së bashku me aleatët dhe partnerët do të përgjigjen me vendosmëri dhe do të imponojnë kosto të shpejta dhe të rënda ndaj Rusisë. Presidenti Biden përsëriti se një pushtim i mëtejshëm rus i Ukrainës do të shkaktonte përhapje të gjerë të vuajtjeve njerëzore dhe do zvogëlojë pozitën e Rusisë, duke shtuar se ai ia kishte bërë të qartë Presidentit Putin se ndërsa Shtetet e Bashkuara mbeten të përgatitura për t’u angazhuar në diplomaci, në koordinim të plotë me aleatët dhe partnerët tanë, ne jemi po aq të përgatitur për skenarë të tjerë.
Telefonata midis dy liderëve vjen disa orë pasi SHBA-ja zhvendosi disa nga forcat e saj nga Ukraina dhe urdhëroi evakuimin e pjesës më të madhe të stafit të ambasadës së saj të shtunën, pasi frika shtohet se një pushtim rus i vendit mund të ndodhë në ditët e ardhshme. Lëvizjet ishin një tjetër shenjë se SHBA ka frikë se Putini mund të urdhërojë një pushtim në çdo kohë, vetëm një ditë pasi këshilltari i sigurimit kombëtar të Biden paralajmëroi amerikanët në Ukrainë të largoheshin dhe se aksioni ushtarak mund të fillonte me një bombardim ajror që mund të vriste civilë.
Përpara thirrjeve, Ministria e Punëve të Jashtme ruse akuzoi vendet perëndimore dhe shtypin për përhapjen e një “fushate dezinformimi në shkallë të gjerë” rreth një pushtimi gjoja të afërt rus të Ukrainës “me qëllim që të largojnë vëmendjen nga veprimet e tyre agresive”.
“Në fund të vitit 2021 dhe në fillim të vitit 2022, hapësira globale e informacionit u përball me një fushatë mediatike të paprecedentë në shkallën dhe sofistikimin e saj, qëllimi i së cilës është të bindë komunitetin botëror se Federata Ruse po përgatit një pushtim të territorit të Ukrainës. ”, thuhet në një deklaratë të Ministrisë të publikuar në faqen e saj.
Biden, i cili po kalon fundjavën në Camp David, mori pjesë në një takim virtual nga Shtëpia e Bardhë të premten me liderë nga Kanadaja, Mbretëria e Bashkuar, Franca, Gjermania, Italia, Polonia, Rumania, NATO, Komisioni Evropian dhe BE-ja. Këshilli do të diskutojë përshkallëzimin e tensioneve.
Pas thirrjes, këshilltari i sigurimit kombëtar të Biden, Jake Sullivan, doli para shtypit duke thënë se megjithëse Putin nuk ka vendosur nëse do të veprojë, ekziston një “mundësi shumë e dallueshme” që Rusia të përfshihet me shpejtësi në një aksion të madh ushtarak.
Sullivan paralajmëroi se një sulm rus në Ukrainë mund të fillojë së shpejti, duke filluar me bombardimet ajrore dhe sulmet me raketa. Ai këshilloi të gjithë amerikanët në Ukrainë që të largohen nga vendi për sigurinë e tyre sa më shpejt të jetë e mundur.
“Ne padyshim që nuk mund të parashikojmë të ardhmen, nuk e dimë saktësisht se çfarë do të ndodhë. Por rreziku tani është mjaft i lartë dhe kërcënimi tani është mjaft i menjëhershëm saqë kjo është ajo që kërkon maturia,” tha ai. /5pyetjet.al
