Gazetari izraelit, Nadav Eyal, pretendon se Izraeli ka refuzuar që t’ia shesë Ukrainës sistemin e mbrojtjes raketore Kupola e Hekurt (Iron Dome)
Në shkrimet e shkruara në shtypin izraelit, Eyal tha se refuzimi i Izraelit për të furnizuar Ukrainën me teknologji është për të shmangur zemërimin e Rusisë.
Tel Avivi është i kujdesshëm që të mos përfshihet në konflikt sepse vendosja e Rusisë në Siri do të thotë që të dy vendet në fakt ndajnë një kufi.
Ukraina fillimisht paraqiti kërkesën e saj në SHBA pasi sistemi i mbrojtjes u zhvillua bashkërisht nga Izraeli me Pentagonin.
“Kievi filloi një fushatë presioni ndaj ligjvënësve në Washington për të lehtësuar një marrëveshje. Ukrainasit gjithashtu zyrtarisht kërkuan nga SHBA të vendosë sistemet raketore amerikane Patriot dhe Kupola e Hekurt në territorin e tyre pranverën e kaluar, përpara se një pushtim rus të bëhej një mundësi reale”, pretendon gazetari.
Megjithatë, marrëveshja midis dy aleatëve nuk lejon shitjen e teknologjisë palëve të treta pa pëlqimin e ndërsjellë.
Izraeli përdori sistemin mbrojtës Kupola e Hekurt për të ndaluar raketat me rreze të shkurtër dhe raketat e lëshuara nga grupet e rezistencës palestineze nga Rripi i Gazës majin e kaluar.
Tensionet midis Rusisë, Ukrainës dhe Perëndimit janë përshkallëzuar kohët e fundit për shkak të një pushtimi të mundshëm të Ukrainës nga Rusia.
Moska, sipas zyrtarëve ukrainas, kohët e fundit ka grumbulluar më shumë se 100.000 trupa pranë Ukrainës, duke shkaktuar frikën se Kremlini mund të planifikojë një tjetër ofensivë ushtarake kundër fqinjit të tij ish-sovjetik.
Rusia ka mohuar se po përgatitet për pushtim dhe ka akuzuar vendet perëndimore për rrezikimin e sigurisë së saj përmes zgjerimit të NATO-s drejt kufijve rusë.
