Kryetari i Partisë Demokratike, Lulzim Basha u shpreh sot në Kuvend se komisioni i inceneratorëve zbardhi të vërtetën, ndërsa SPAK, tashmë sipas tij duhet të lëshojë prangat dhe jo të kthehet bosh.
“Paradoksi i dikujt që duhet të ishte para drejtësisë është mbi drejtësinë do të zgjasë edhe pak. Por qëndrimi ynë është i qartë, çdo punonjës i SPAK dhe BKH që është nën presion nga Rama duhet ta dijë, se kanë mbështetjen e PD dhe opozitës në shkuarjen deri në fund të kësaj afere, ka mbështetjen e taksapaguesve shqiptare bashkë me aleatët tanë euroatlantik.
Zonja dhe zotërinj të SPAK bëni detyrën tuaj, komisioni hetimor i ka nxjerrë hapur fajtorët e vjedhjes së shekullit. Mos i lini makinat e policisë që shkojnë të arrestojnë zyrtarët e lartë të Kryeministrisë, të kthehen në mes të natës bosh, por kthejini me zyrtarët me pranga në duar, nga i pari tek i fundit.
Të enjten e kaluar është nisur procesi i një prej zyrtarëve të lartë të qeverisë, por është kthyer, e kam nga raportime të pakonfirmuara, po ashtu edhe për një anëtar të grupit të PS-së, deputet. Ndërkohë që komisioni hetimor ka nxjerrë në pah përgjegjësitë e kryebashkiakëve dhe ministrave, cfarë prisni më, sytë i kemi nga SPAK” tha ai.
Edhe jashtë Kuvendit, Basha përsëriti akuzat kundër qeverisë. “Për më shumë se dy javë, komisioni Tabaku zbardhi të vërtetën e aferës më të madhe korruptive.
430 mln euro janë zhvatur qytetarëve shqiptarë në një mënyrë dhe formë nga Edi Rama dhe tre ministra, tre kryebashkiakë dhe dy sekretarë, Engjell Agaci dhe Damian Gjiknuri. Ndonjëri është i çuditur që nuk është në pranga, por në parlament” tha ai.
Basha tha se kanë qenë edhe socialistë që kanë furnizuar PD-në me dokumente për inceneratorët. “E kanë bërë edhe socialistët, që kanë furnizuar me dokumente komisionin hetimor. I shpreh mirënjohjen cdo socialiste dhe socialisteje që e ka bërë këtë”.
Edi Rama tha dje se nuk e ka takuar Mirel Mirëtirin, por Lulzim Basha mendon ndryshe. “Ai ka darkuar me Mirel Mërtitin në Kryeministri, e ka shpallur gjeni para ministrave, anëtarin e bandës së Lushnjes”.
Një thirrje kishte për socialistët, që sipas tij janë përfshirë në dosjen e inceneratorëve. “Tregoni emrat për t’i shpëtuar burgut”.
/5pyetjet.al
