Kreu i Lëvizjes Qytetare URA dhe zëvendëskryeministri në detyrë i Malit të Zi, Dritan Abazoviç, tha se për qeverinë e pakicës është ende në pritje të qëndrimit të Partisë Popullore Socialiste (SNP).
URA do të respektojë qëndrimin e SNP-së, sido që të jetë ai për çështjen e qeverisë minoritare.
“Sa na përket ne, çdo gjë duhet bërë shumë më shpejt, më konkretisht dhe me efikasitet”, tha politikani shqiptar, raporton rtcg.
I pyetur se kush do të formojë qeverinë e pakicës dhe nëse do të jetë SNP, Socialdemokratët dhe Partia Socialdemokrate, Abazoviç tha se janë ende në pritje të qëndrimit të SNP-së.
Ndërkohë, deputetët e DPS-së, SDP-së dhe koalicionit shqiptar “Njëzëri”, Partia Boshnjake, SD dhe GP URA, 43 prej tyre, i kanë dorëzuar nënkryetarit të Kuvendit, Strahinja Bulajiq propozimin për mbajtjen e seancës parlamentare më 3 mars.