Ministrja e Arsimit, Arbërie Nagavci ka reaguar pas vrasjes së një 14-vjecari në afërsi të shkollës “Hilmi Rakovica”, në Prishtinë.
Nagavci tha se kjo është një ditë e rëndë, teksa shtoi se nga organet e rendit është siguruar se hetimet po zhvillohen me intensitet të lartë.
“Nga vizita në shkollë dhe në familje, në komunikim me organet e rendit, u sigurova se hetimet po zhvillohen me intensitet të lartë dhe presim që shpejt të zbardhet rasti. Si nënë, si mësimdhënëse, e si ministre, i lus të gjithë mësimdhënësit dhe prindërit që të punojnë edhe më shumë në edukimin dhe ndërgjegjësimin e fëmijëve, të jenë të kujdesshëm për sjelljet që mund të manifestojnë ata dhe t’i adresojnë problemet dhe vështirësitë që kanë”, ka shkruar ajo në një postim në “Facebook”.
14 vjeçari u qëllua me thikë, në shkollën “Hilmi Rakovica”, në Vranjevc.
Rastin e ka konfirmuar zëdhënësja e Policisë së Kosovës për Rajonin e Prishtinës, Flora Ahmeti.
“Sot rreth orës 07:30, kemi jemi informuar për një rast vrasje, në rrugën “Fahri Fazliu”, në Prishtinë. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore.
