Ndikimi që mund të ketë konflikti i armatosur në Ukrainë në ecurinë ekonomike të Shqipërisë, ishin në fokus të një takimi mes Guvernatorit të bankës Gent Sejko dhe ministres së Financave dhe Ekonomisë, Delina Ibrahimaj.
Në takim u diskutuan rreziqet e mundshme nëse do të këtë një përshkallëzim të konfliktit, si dhe masat e nevojshme për përballimin e situatës.
Megjithatë nga vlerësimet e deritanishme të faktorëve makroekonomik, tregtar, financiar dhe bankar, nuk konstatohen rreziqe të shtuara, për shkak të ekspozimit të ulët që ka ekonomia ndaj vendeve në konflikt.
“Testet tona paraprake të rezistencës tregojnë se ekonomia shqiptare ka hapësira të mjaftueshme për t’u rezistuar goditjeve të mundshme që vijnë nga ekspozimi direkt me vendet në konflikt. Stabiliteti ekonomik dhe financiar i vendit është i konsoliduar, kursi i këmbimit shfaqet i qëndrueshëm dhe rezerva valutore mbetet në nivel të mjaftueshëm”.
Banka e Shqipërisë thekson se në rast se konflikti mbetet i përmbajtur, këto goditje do të lënë vetëm gjurmë kalimtare në aktivitetin ekonomik dhe në inflacion.
