Sali Berisha kërkoi sot miratimin e një rezolute në Kuvend që dënon agresionin rus kundër Ukrainës dhe mbi të gjithë tërheqjen e Shqipërisë nga “Ballkani i Hapur”, pasi Serbia nuk i vendosi sanksione Moskës.
Por Edi Rama, tha sonte nga Lushnja se, nisma është për të lehtësuar jetën e qytetarëve dhe jo për të ndryshuar qëndrimin e politikës së jashtme.
“Pas ngjarjeve që po ndodhin dhe flasin, a thua që ne që kemi marrë këtë nismë nuk e kemi ditur, se çfarë është Rusia dhe cilat janë lidhjet me Serbinë?
Dhe a thua që Ballkani i Hapur është lidhja e dikurshme e miqësisë shqiptaro-kineze. Por Ballkani i Hapur, edhe dje edhe sot lehtëson njerëzit që zhvillonin aktivitet në këtë Ballkan.
Nuk po ndryshojmë trajektoren e politikës së jashtme, ndaj asnjërit prej fqinjëve, apo në raport me aleancat që ka njëri apo tjetri, por po përmirësojmë kushtet e veprimtarisë ekonomike të njerëzve” tha Rama.
Gjatë bisedës nuk munguan batuta për lehtësimin e masave anti-covid. “Mua më thanë që qeveria e ka marrë informacionin që këto masat shtrënguese… a maskat nuk janë hequr? A se nuk i kam lexuar të gjitha. Shyqyr që hoqën atë orarin se e kishin harruar” tha Rama.
/5pyetjet.al
