Beteja për kryeqytetin e Ukrainas mund të bëhet Stalingradi i ri i Rusisë, ka thënë deputeti ukrainas, Sviatoslav Yurah për transmetuesin britanik, BBC. Ai ka thënë se Kievi është përballur me sulme me raketa gjatë natës dhe se ka beteja të vazhdueshme në afërsi të qytetit. Mirëpo ai ka paralajmëruar se Rusia duhet të përgatitet për humbje të mëdha nëse avancon në qytet.
“Është qytet masiv me miliona banorë dhe nëse rusët tentojnë të hyjnë, ata do të përballen me luftime të mëdha – kjo mund të shndërrohet në Stalingradin e tyre”, ka thënë ai, duke iu referuar betejës më të përgjakshme të Luftës së Dytë Botërore, në të cilën rreth 1.1 milion trupa sovjetike dhe 800,000 gjermanë nazistë dhe rumunë kanë vdekur.
Beteja e periudhës 1942-43 kanë qenë pikë kthese, pasi ka ndalur avancimin e nazistëve në Rusi. “Askush nuk do të dorëzohet – mund të garantoj për këtë gjë”, ka thënë ai. Sipas Ministrisë britanike të Mbrojtjes, forcat ruse tani janë rreth 25 kilometra larg qendrës së Kievit. Rreth 1.6 milion persona kanë ikur nga Ukraina në Poloni, prej shpërthimit të luftës më 24 shkurt, ka thënë Garda Kufitare polake të shtunën.
Jo të gjithë prej këtyre refugjatëve besohet se janë në Poloni. Maciek Duszczyk, zëvendës-rektor për hulumtime në Universitetin e Varshavës, ka vlerësuar se rreth 1 milion refugjatë janë në Poloni dhe pjesa tjetër ka shkuar në shtete tjera.
Pjesa më e madhe e refugjatëve kanë shkuar në qytete të mëdha, për shkak të mundësive më të mëdha për punësim. Autoritetet lokale në Varshavë dhe Krakov, kanë thënë se janë mbushur kapacitetet e strehimit të refugjatëve.
