Deri më 15 Mars çmimi i naftës dhe benzinës do të jetë 217 lekë për litër ndërsa gazi do të shitet 93 lekë për litër. Nesër do të zhvillohet mbledhja e radhës e bordit për të vendosur si do të vazhdohet në ditët në vijim.
Gjithashtu qeveria ka zbuluar penalitetet për pikat që do të abuzojnë duke rritur çmimin mbi 217 lekë. Nëse do të kapen me shkelje, pikat e shumicës do të gjobiten me 10 mln lekë, të pakicës me 2 mln lekë dhe në rast përsëritje i pret heqja e licencës.
“Në rast të mosrespektimit të çmimit tavan përkatës, të vendosur nga Bordi, zbatohen sanksionet e mëposhtme:
a) Shoqëritë e tregtimit me shumicë të produkteve të naftës dhe gazit dënohen me gjobë, në masën 10 (dhjetë) milionë lekë;
b) Shoqëritë e tregtimit me pakicë të produkteve të naftës dhe gazit, të cilat nuk respektojnë çmimin tavan përkatës të vendosur nga Bordi, dënohen me gjobë, në masën 2 (dy) milionë lekë;
c) Në rast përsëritjeje, masave të mësipërme, të përcaktuara në shkronjat “a” dhe “b”, të këtij neni, i shtohet edhe heqja e licencës së tregtimit” mbyllet vendimi.
