Orë tmerri po përjetojnë banorët e Kievit, ndërsa ushtria ruse vijon bombardimet në zonat e banuara në kryeqytet. Pas sulmeve të raportuara gjatë natës, shpërthime të fuqishme janë dëgjuar edhe mëngjesin e së martës në qendër të Kievit. Disa godina mësohet të jenë dëmtuar, ndërsa shërbimet e emergjencës flasin për të paktën 2 viktima. Autoritetet publikuan pamjet e një tjetër pallati 9 katësh ne zonën e Svjatoshinski në Kiev, e përfshirë nga flakët pas bombardimit.
Është qëlluar gjithashtu një stacion qendror i metrosë së kryeqytetit, ku ka mbetur e dëmtuar fasada dhe disa zyra.
Edhe Kharkiv vijon të jetë në shënjestrën e zjarrit rus, dhe të paktën 2 persona u raportuan si të vrarë pasi një raketë qëlloi një godinë banimi. Shërbimet e emergjencës dhe ekipet e shpëtimit po kërkojnë për persona të bllokuar në rrënoja. Godina, pranë qendrës historike të Kharkiv, u përfshi nga flakët pas dëmtimit të tubave të gazit.
Më shumë se 4 mijë persona mundën të largoheshin nga qyteti i rrethuar i Maroiupol ditën e hënë, me përpjekjet e evakuimit që do të vijojnë edhe sot.
Imazhet satelitore tregojnë përmasat e dëmeve në qytetin strategjik që po përjeton krizën më të rëndë humanitare në konfliktin ukrainas.
Korridore evakuimi janë planifikuar edhe në rajonin veri lindor të sulmit, edhe ai i prekur nga luftimet e ashpra.
Ndërsa Shtetet e Bashkuara pretendojnë se ushtria ruse po shënon pak progres, ka raportime se një autokolonë e madhe mjetesh ushtarake po drejtohet nga bjellorusi në kufirin me Ukrainën. Autoblindat mund ti përkasin federatës ruse sipas agjencisë ukrainase Unian.
