1007 delegatët e PS-së kanë miratuar ndryshimet në statutin e ri në kongresin e sotëm. Anëtarët miratuan shtimin e tre sekretarëve të rinj dhe riorganizmin, që fillon me shkarkimin e 61 kryetarëve aktualë të degëve në të gjitha bashkitë. Kreu i PS-së, Edi Rama njoftoi se do të ketë një kongres tjetër në vjeshtë dhe gjithashtu do të pyeten anëtarët me shkrim për institucionet, kryetarin e bashkisë, deputetët dhe drejtuesit e qarkut.
“Në vjeshtë të bëhet një Kongres që t’i kushtohet llogaridhënies, cfarë thamë sot, që do të jetë edhe një periudhë sfiduese dhe prove për të gjithë. Propozoj që të nisim punën sigurisht me zgjedhjet e kryetarëve të bashkive në bashki.
Por duhet të ndërtojmë një mekanizëm të marrjes së opinionit të partisë për institucionet vendore dhe qendrore në territor. Një marrje mendimi me shkrim. E gjithë partia do të ftohet që të japë opinionin e vet me një fletë sekrete për të gjithë drejtuesit, bashkitë dhe të gjitha institucionet” tha Rama.
Tre sekretarët e rinj
Sekretare për koordinimin- Blerina Gjylameti
Sekretar Ekzekutiv-Eridian Salianji
Sekretar për Emigracionin-Laert Duraj
