Policia bullgare ndaloi ish-ministren rumune të Turizmit dhe Zhvillimit Elena Udrea, e cila tentoi të largohej nga vendi pasi një gjykatë rumune e kishte dënuar me gjashtë vjet burg.
Vendimi përfundimtar konfirmoi një dënim të lëshuar fillimisht në qershor 2018 për ryshfet, shpërdorim detyre dhe evazion fiskal.
E ashtuquajtura dosja “Gala Bute” doli për herë të parë për publikun në vitin 2011 pas një hetimi gazetaresk të kryer kur Udrea ishte ministër.
Ajo u ndalua në kufirin bullgar me Greqinë dhe ishte ende në paraburgim në Petrici të Bullgarisë. Ajo mbahej nën një urdhër ndalimi 24 orësh të lëshuar nga policia bullgare, i cili mund të zgjatet.
Ajo thuhet se ishte larguar nga Rumania për në Bullgari të enjten në mëngjes dhe, menjëherë pasi mësoi vendimin e saj përfundimtar në Sofje, u nis për në Kulata, vendkalimi kufitar jugor i Bullgarisë me Greqinë.
Avokati i Udreas, Tudorel Toader, ish-ministre e Drejtësisë në Rumani nga viti 2017 deri në vitin 2019, kishte paraqitur një apel duke kërkuar anulimin e dënimit të saj të mëparshëm në vitin 2018.
Fakti që Udrea u përpoq t’i shmangej ekzekutimit të dënimit të saj duke u arratisur në Bullgari nuk dënohet nga ligji rumun, pasi më parë asaj nuk i ishte ndaluar të largohej nga Rumania.
Udrea ishte Ministre për Turizmin nga 2008 deri në 2009 dhe për Zhvillimin Rajonal dhe Turizmin nga 2009 deri në 2012.