Pas zgjedhjeve presidenciale dhe parlamentare në Serbi, në të cilat fitoi Aleksandar Vuçiç dhe partia e tij presioni ndaj Beogradit për t’iu bashkuar sanksioneve kundër Rusisë papritmas u rrit dhe për herë të parë gjatë krizës ukrainase pakënaqësi shfaqi edhe Moska, shkruan e përditshmja e Moskës “Kommersant”.
Në një artikull të titulluar “Serbia po sulmohet nga të gjitha anët – edhe Perëndimi edhe Rusia janë të pakënaqur me Beogradin”, gazeta shkruan se presidenti serb Aleksandar Vuçiç, i cili u gjend në mes të zjarrit diplomatik mes dy palëve, do të ndërmarrë hapa drejt Perëndimit, por vështirë se do të largohet nga Rusia.
Presioni ndaj Beogradit drejtohet nga Gjermania, e cila konsiderohet si partneri kryesor i Serbisë në BE, shkruan e përditshmja, duke shtuar se presidenti gjerman Walter Steinmeier në mesazhin e tij urimi drejtuar Vuçiçit javën e kaluar ka thënë se koordinimi i politikës së jashtme serbe me BE-në, veçanërisht ndaj Rusisë, përfshirë sanksionet, është vendimtar. E përditshmja ruse shkruan se partneri kryesor i Partisë Progresive Serbe të Vuçiçit është Partia Socialiste e Serbisë e Ivica Daçiqit, i cili në Serbi konsiderohet njëri nga politikanët kryesorë prorusë”.
