Pasditen e kësaj të mërkure, në qytetin e Lushnjës janë dëgjuar të shtëna me armë zjarri, në afërsi të ish-stacionit të trenit.
Nga ky atentat ka mbetur i plagosur, Kujtim Meta, 44 vjeç, që është dërguar me urgjencë drejt spitalit të Tiranës. Në momentin e ngjarjes ai ka qenë duke pirë kafe në një nga lokalet e zonës.
Mësohet se policia ka shkuar në vend ngjarje dhe po punon për zbardhjen e çështjes, ndërkohë që ende nuk dihet asgjë për autorin.
“Sot rreth orës 16:15, në afërsi të stacionit të trenit, Lushnjë, në rrethana ende të paqarta është plagosur me armë zjarri shtetasi K. M., 44 vjeç, banues në Saravë, Lushnjë, i cili ndodhet në spital nën kujdesin e mjekëve.
Shërbimet e Policisë dhe grupi hetimor po vijojnë punën intensive për identifikimin e autorit dhe zbardhjen e plotë të ngjarjes.
Janë ngritur pika kontrolli në të gjitha hyrje-daljet e qytetit të Lushnjës me qëllim kapjen e autorit,” ka njoftuar policia.
