Mbi 3000 viktima civile janë vrarë në Ukrainë që nga pushtimi rus i 24 shkurtit. Kështu deklaroi Zyra e Kombeve të Bashkuara për të Drejtat e Njeriut, duke saktësuar se numri i të vdekurve është 3153 persona, 254 më shumë se të premten. Sipas OHCHR numri real është dukshëm më i lartë duke patur parasysh vështirësitë e verifikimit.
Mospërputhjet e mundshme në shifrat e regjistruara vijnë nga vështirësia në marrjen e informacionit nga zona të caktuara të vendit dhe raportet që janë ende në pritje të vërtetimit.
Kjo përfshin mungesën e verifikimit të numrit të madh të viktimave civile nga vende si qyteti port i rrethuar i Mariupolit, i cili ka pësuar bombardime të pamëshirshme që nga fillimi i luftës, me këshillin e qytetit që vlerëson rreth 80% deri në 90% të ndërtesave të qytetit janë dëmtuar ose shkatërruar.
Satelitët kanë identifikuar gjithashtu varrime masive pranë Mariupolit që përmbajnë rreth 200 varre, të cilat ka të ngjarë të përdoren për të varrosur trupat e civilëve.
Autoritetet lokale kanë vlerësuar se një numër i madh civilësh janë vrarë nga bombardimet e qytetit.
OKB-ja beson se shumica e civilëve në të gjithë vendin janë vrarë nga armët shpërthyese, por raporti nuk specifikoi se kush ishte përgjegjës për viktimat.
Ndërkaq kreu i policisë rajonale të Kievit, Maksym Ocheretianyi ka deklaruar në një konferencë se në territoret e çliruara, deri më tani janë dokumentuar 1202 trupa civile.
“Në rajonin e Kievit, veçanërisht në territoret e çliruara, deri më tani kemi dokumentuar 1202 trupa të pajetë të civilëve të pafajshëm të vrarë nga rusët”, tha ai.
