Ndërsa Sali Berisha ishte në Durrës këtë të martë, rivali i tij në garën për kreun e PD, Ibsen Elezi, vijoi takimet në Fier, ku në krah kishte edhe deputetin e PD, Luan Baçi.
Elezi ndër të tjera, theksoi se Berisha me këtë lloj organizimi ku po krijoheshin grupime të ndryshme, nuk po shkonte asgjëkund dhe se nuk do të arrinte të rrëzonte Ramën nga pushteti. Ndërsa theksoi se ish kryeministri, nuk ishte konservator siç e përmend shpesh në takimet e fundit.
“Me këtë turmë që ka marrë Sali Berisha dhe me këtë ushtri të shpërndarë që po ndërton vetëm po gënjejmë veten sërish. Mua më vjen shumë keq ta them por ne nuk arrijmë dot ta tundim Edi Ramën me themele kur në fakt ky i fundit është i shkundur nga pakënaqësitë që ka shkaktuar mes njerëzve. Nuk e duan me njerëzit atë.
Sa i përket temës së konservatorizmit. Që të jesh konservator duhet të duash traditat e vendit, siç ne kemi traditë kuvendimin. Te kjo e konservatorizmit, unë e di se doktori nuk është konservator edhe nuk jam shqetësuar shumë, por unë nuk mund t’i them tani, ose do të na thuash jam konservator ose na thuaj që nuk jam. Konservatorët kanë një rregull, nuk fantazojnë kot. Ata e dinë se nuk bëhen dot plane me njerëzit. Komunizmi bëri plane me njerëzit, por dështoi”– u shpreh Elezi.
