Në datë 23 maj në orën 18:00 do të zhvillohet raundi i dytë për zgjedhjen e kreut të ri të shtetit. Raundi i parë dështoi dje, pasi nuk u propozua asnjë emër.
Opozita në mbledhjen e sotme të konferencës së kryetarëve kërkoi që emrin ta propozojnë ata, por shumica e rrëzoi këtë kërkesë, pasi e cilësoi përjashtim nga procesi.
Por si zgjidhet Presidenti?
Një grup me jo më pak se 20 deputetë ka të drejtën t’i propozojë Kuvendit kandidaturën për President të Republikës së Shqipërisë. Por një deputet nuk mund të propozojë më shumë se një kandidat për Presidenti.
Kushtetuta përcakton se janë pesë raunde për zgjidhjen e Presidentit. Në tre raundet e para kërkohet një shumicë prej 3/5, 84 vota, ndërsa në dy e tjera, të katërtin dhe të pestin, presidenti mund të zgjidhet me 71 vota. Raundet nga njëri tjetri duhet të zhvillohet brenda 7 ditëve.
