Komisioni i Ligjeve u përfshi sot nga debati mes shumicës dhe opozitës për anëtarët e Autoritetit për të Drejtën e Informimit mbi Dokumentet e ish Sigurimit të Shtetit. Me shumicë votash, kandidatët që do ti kalojnë Kuvendit për votim janë:
Altin Hoxha
Gentian Sula
Simon Miraka
Albert Nikolla
U rrëzuan;
Marcel Hila
Besim Ndregjoni
Gjergj Marku
Skender Vrioni
Sekretari i përgjithëm i PD-së, Gazment Bardhi akuzoi shumicën se votoi, Simon Mirakën që sipas tij është propozim i Sali Berishës. “Jeni të pafytyrë se keni bërë një betim që nuk votoni asnjë person të propozuar nga “non grata”, ja tek e keni firmën, sapo votuat një person që është propozuar nga “non grata”, po ju tregoj se çfarë përfaqësoni ju, ata njerëz që tjetër thoni dhe tjetër bëni. Jeni betuar ju, keni 6 muaj, që do rrëzoni çdo dokument që vjen nga “non grata”-t, shpjegojeni votën tani”, u shpreh Bardhi.
Kryetari i grupit të PD-së, Enkelejd Alibeaj kishte akuza edhe më të forta. “Para 4 viteve i latë opozitës një pjesë të anëtarësisë, sot nuk doni më. Nuk po kërkoj mëshirën tuaj, por të paktën zbatimin e ligjit.
Cilat janë kandidaturat nga kuvendi? Po kërkoni ta rrëmbeni, duket se nuk jeni të ngopur me shumicën 3 nga 5, i doni të pesta. E shikoni ku shkon babëzia juaj. Cilat janë kandidaturat nga shoqatat e të përndjekurve?” ishte pyetja e tij.
Deputeti socialist Xhemal Qefalia hapi një tjetër debat. “Brenda grupit tuaj të opozitës, ka përfaqësues që nuk kanë guxuar të marrin dokumentin për pastërtinë. Se hiqeni të gjithë këtu….nxirrni dokumentin, mos qeshni dhe zgërdhiheni, ku e keni nxirrni dokumentin” tha ai.
Deputetja Dhurata Çupi e sfidoi “Të dalin në faqen e kuvendit. E pranoni ju Qefalia, këtë sfidë, të dalin të gjithë me dokumentin nga Autoriteti?”.
