Vrasësi me pagesë Ervis Bardhi është përplasur sot në Gjykatën e Posaçme kundër Krimit dhe Korrupsionit me Ardian Çapjen lidhur me dëshmitë për vrasjen e Nezir dhe Gentjan Beqirit në vitin 2002.
Bardhi pasi u arrestua pranoi që të bashkëpunonte me drejtësinë. Ai tregoi se ishte Florenc dhe Ardian Çapja që i kërkuan që të vriste babë e bir. “Pranova t’i vrisja me Olsi Lekun vetëm për leket.
S’kisha asnjë konflikt me ata” tha Bardhi në gjyq. Kjo shkaktoi reagimin e ashpër të Çapjas i cili i revoltuar e akuzoi se po gënjen. “Ti gënjen, je mashtrues ordiner”.
Gentian dhe Nezir Beqiri u vranë në banesën e tyre, djali ishte në ‘arrest shtëpie’ dhe ruhej me dy policë në derën e shtëpisë, pasi akuzohej si autor i vrasjes së biznesmenit të njohur Sokol Çapja, ngjarje kjo e ndodhur në dhjetor të vitit 2005.
Vrasja e Gentian Beqirit, është kryer në ambientet e brendshme të banesës së tij, që ndodhet në lagjen “Sporti i vjetër” në Elbasan, ku teksa qëndronte i shtrirë në krevat pasi ishte i paralizuar është qëlluar për vdekje me 7 plumba të një pistolete me silenciator.
Babai i tij u rrah barbarisht deri në vdekje me sende të forta, duke pësuar fraktura në 6 brinjë dhe hemorragji në tru dhe në mëlçi.
Kjo ndodhi ndërkohë që jashtë derës së shtëpisë ruanin dy efektivët e policisë, të cilët u akuzuan më pas për “Shpërdorim detyre”.
