Një ditë pasi u votua në parlament, si presidenti i ri i Republikës së Shqipërisë, Bajram Begaj ka zhvilluar takimin e tij të parë me ish-presidentin Alfred Moisiu, i konsideruar si një nga krerët më të mirë të shtetit në vendin tonë në periudhën e pluralizmit.
‘News 24’ mëson se takimi i informal ka nisur rreth orës 10:00 dhe është bërë me kërkese të presidenti të sapozgjedhur Bajram Begaj. E përbashkëta mes tyre, është fakti se të dy vijnë nga një karrierë ushtarake. Në fokus të takimit ka qenë detyra e re e Begajt ku Moisiu i ka ofruar disa këshilla presidentit të ri.
Deri në marrjen e detyrës së Presidentit të Republikës së Shqipërisë, Begaj do të zhvillojë disa takime të tjera. Në ditët dhe javët në vazhdim pritet të ketë takime me ish-presidentë të tjerë të vendit si Bamir Topi dhe Rexhep Meidani. Bajram Begaj u zgjodh nga parlamenti me 78 vota pro, 4 kundër dhe 1 abstenim, duke marre edhe një votë nga opozita, ndërsa Berisha dhe Alibeaj e bojkotuan votimin.
